හැමෝටම නැති තිබ්බොත් ගොඩයන විපරීත රාජයෝගයක් ඔබටත් තිබේ දැයි බලා ගන්න

කේන්දරයක 6,8,12 යන භාවයන් සාමාන්‍යයෙන් අප සලකනුයේ සතුරු ස්ථානයන් ලෙසය. එසේ අප සලකනුයේ එම භාවයන් කේන්ද්‍රයක නියෝජනය කරන දැයෙහි ස්වභාවයන් අනුවය. හය වන භාවය සතුරන්, කරදර, ණය සහ රෝග ඛාරක තත්වයන් පිළිබඳවද. අට වන භාවය නියෝජනය කරන්නේ මරණය සහ විනාශයයි.  එසේම දොළොස් වන භාවයෙන් වැය පක්‍ෂයත්, අනවශ්‍ය වියදම් පිළිබඳවත් නිවේදනය කරනු ලබයි.

එසේ කේන්දරයක හයවැන්න , අටවැන්න, දොලෝස්වැන්න අධිපති ග‍්‍රහයෝ තිදෙනා තමතමන්ගේ ස්ථාන මාරුකරගෙන සිටිමේන් මෙම විපරීත රාජ යෝග ඇතිවෙයි. ඒ අනුව ඒ ස්ථාන මාරු කරගෙන සිටිමෙන් හර්ෂා යෝගය, සරලා යෝගය. විමලා යන යෝග සැදේ.

හයවැන්න අධිපතියා හය අට දොලොහ යන ස්ථාන වලින් එකක යෙදීමෙන් සෑදෙන හර්ෂා යෝගයත්, අටවැන්න අධිපති එකී ස්තාන වලින් එකක යෙදීමෙන් සෑදෙන සරලා යෝගයත් ,දොලොස්වැන්න අධිපති ඉහත කී ස්තානවලින් එකක යෙදීමෙන් විමලා යෝගයත් යෙදෙනු ලබයි.

මෙම යෝගයෙන්ගෙන් උපදින්නා ජීවිතයේදී අනපේකෂිත ලෙස දියුණුවකට පත්වෙ.කේන්දරයේ සෙසු බලවත් විමි අනුව දියුණුව අඩු වැඩිවීම් සිදුවන්න පුලූවන්.

හර්ෂා යෝගය ඇතිව උපන් තැනැත්තා නිතරම ජයග්‍රහණ ලබනවා. ප්‍රිතියෙන් කල් ගෙවනවා. වාසනාවන්තයි. පාපී ක්‍රියාවන්ට යොමු වෙන්නේ නෑ.ජේ.ආර්. ජයවර්ධන හිටපු ජනාධිපතිතුමා කන්‍යා ලග්න හිමියෙක්. ඔහුගේ හයවැන්න අධිපති වන ශනි හයවැන්නේම තැන්පත්ව ඔහුට හර්ෂා යෝගය නිර්මාණය වී තිබුණා. ඩඩ්ලි සේනානායක මැතිතුමාද කන්‍යා ලග්න හිමියෙක්. ඔහුගේත් හයවැන්නාධිපති ශනි අටවැන්නේ තැන්පත්ව හර්ෂා යෝගය නිර්මාණය වී තිබුණා.

සරලා යෝගය අටවැන්න අධිපතියා 6,8,12 යන ස්ථාන තුනෙන් එකක තැන්පත් වීමට කියන්නේ සරලා යෝගය කියලා. මෙම යෝගය පිහිටි තැනැත්තා දීර්ඝ ආයුෂ ලබනවා. උගතෙකි. නිර්භීතයි. සමෘද්ධිමත්, ප්‍රසිද්ධිය ලබනවා. හිටපු ඉන්දීය අගමැති වී.පී. සිං මැතිතුමා කටක ලග්න හිමියෙකි. එතුමාගේත් අටඅධිපති ශනි හය වැන්නේ පිහිටීමෙන් සරලා යෝගය නිර්මාණය වී තිබුණා.

විමලා යෝගය‍ දොළොස්වැන්න අධිපතියා 6,8,12 යන ස්ථාන තුනෙන් එකක පිහිටීමට විමලා යෝගය කියලා කියනවා. මේ යෝගය ඇතිව උපන් තැනැත්තා සතුටින් ජීවත්වන කිසිවකුටත් යටත් නොවන නිවහල් චින්තනයක් ඇති කෙනෙක්. හිටපු ජනාධිපතිනි චන්ද්‍රිකා බණ්ඩාරනායක මැතිනියගේ කටක ලග්න කේන්ද්‍රයේ ‍ දොළොස්වැන්න අධිපති බුධ ‍ දොළොස්වැන්නේ පිහිටීමෙන් විමලා යෝගය නිර්මාණය වී තිබෙනවා. දුෂ්ට ස්ථාන සහ දුෂ්ට ස්ථාන අධිපතීන් සම්බන්ධව නිර්මාණය වී ඇති මෙම යෝග තුනම විපරීත රාජයෝග විදියට සලකන අතර මෙවැනි යෝගයක් පිහිටි තැනැත්තා ජීවිතයේ මුල් අවධියට වඩා පසු කාලෙක බොහෝ ඉහළට යන බව ජෝතිෂ මූලාශ්‍රවල සඳහන් වෙනවා.

 

බුධ මහ දශාවේ සෙනසුරැ අන්තර් දසාව

බුධ මහ දශාව වසර 17ක් ඉදිරියට පවතින මහ දසාවක්ය.
බුධ මහ දසාව කෙනෙකුට ලබන්නේ සෙනසුරු මහ දසාව අවසන් වීමෙන් අනතුරුවය. සෙනසුරු මහ දසාවේ ඇති කලාවූ මහා පීඩාකාරි තත්වයන් පරදා බුධ ග්‍රහයාගේ ශුභ සෙත සැලසෙන මෙම දසාව එම සෙනසුරු මහ දසාවෙන් පීඩාවිඳි අයෙකුට නම් ඉතාම සහනය ගෙන දෙන බව කිව යුතුය.
තවද සදහන් කල යුතු විශේෂ කාරණාවක් වන්නේ මෙම ග්‍රහයා තවත් ග්‍රහයන් සමග එකතු වි සිටිමෙන් තමා සමග සංයෝග වන ග්‍රහයාගේ ලක්ෂණ ගැනීමයි.බුධ ග්රහයා කුඩා දරුවෙක්ට උපමා කර ඇත්තේ ඒ නිසාය.කුඩා දරුවෙක්ද තමා සමග සම්බන්ධ වන වැඩිහිටියන්ගේ ලක්ෂණ ගන්නා නිසාය. බුධ මහ දසාවේ ශනි අතුරු දසාව අවු 02 මාස 08

බුද මහ දසාවේ අවසාන අන්තර් දශාවයි.ගැටළු සහගත තත්ව, මානසික පිඩා,කලකිරිම් ඇතිවෙන කාලයකි.කල්පනාකාරි නොවුනහොත්
බුධ මහ දසාවේ අනිත් කාල වල ලබාගත් සියලු දේ මෙම කාලයෙදි නැතිවිමට පුලුවන්. එනම් වස්තුව දේපල යාන වාහන ආදි සියල්ලයි.
බුද්ධිමත්ව කටයුතු කලයුතු කාලයකි.
මෙය පොදු සිද්ධන්තයයි.අදල කේන්දරවල ග්රහ බල අනුව වෙනස්විම් සිදුවිය හැක

කාලසර්ප යෝගය කියන තරම් නරකද?

කාලසර්ප යෝගය යනු රාහුටත් කේතුටත් මැදිව කේන්දරයක සියලු ග්‍රහයන් පිහිටීම යනුවෙන් ජ්‍යෙතිෂවේද ශාස්ත්‍රයේ දැක්වේ. අංශක 180 තුළ කලින් සඳහන් කළ ග්‍රහයින් රාහුටත් කේතුටත් මැදිව සිටින අයකුගේ කේන්ද්‍රයක කාල සර්ප යෝගය උදාවෙයි. තාරකා විද්‍යාවට රාහු කේතු ගැන සඳහනක්‌ නැතත් ජෝතිෂ විද්‍යාවට රාහු කේතු බලවත් ග්‍රහයින් දෙදෙනකු ලෙස සලකයි. මේ දෙදෙනා එකිනෙකාට විරුද්ධව පැවැත්ම සහිතය. මෙම යෝගයේ ඵල දීම, ක්‍රියා කාරිත්වය ඉක්‌මන් වෙයි. උගත්කමින් හෝ බලවත් කමින් හෝ, ධනයෙන්, සැපසම්පත් ආදියෙන් ඉහළට නැග පසුව හනික පහළට පල්ලම් බැසීම කාලසර්ප යෝගයේ ප්‍රතිඵල වේ. ලක්‍ෂණය වේ.
එමෙන්ම ලග්න‍ය සහ හත්වැන්න දෙවැන්න සහ අටවැන්න තෙවැන්න සහ නවවැන්න සිවුවැන්න සහ දහවැන්න පස්වැන්න සහ එකොළොස්වැන්න හයවැන්න සහ දොළොස්වැන්න හත්වැන්න සහ ලග්නය යනාදී වශයෙන් කේන්දරයක උත්තරාංශිකව සහ දක්ෂිණාංශිකව රාහු කේතුගේ පිහිටීමට මැදිව ඒ අතර සියලු ග්‍රහයන් පිහිටීම කාල සර්පයෝගය ලෙස හැඳින්විය හැකිය.

ජ්‍යෝතිෂයේ එන විවිධ ග්‍රහයෝග පිළිබඳව නා නා විධ චින්තන ඔස්සේ අදහස් ඉදිරිපත් වේ. කාලසර්ප යෝගය ගැන පමණක් අනිටු විපාක ගැන මිස සුබ විපාක ගැන කිසිවකු කතා නොකරයි. නමුත් කාලසර්ප යෝගය සමඟ ප්‍රබල ග්‍රහයෝග යෙදී ඇති අය අතර සමාජයේ උසස් තානාන්තර දරන විද්වත්හුද සිටිති. බුද්ධිමත් පූජක උතුමන් මෙන්ම ඉතා වාසනාවන්ත යුගදිවි ගත කරන දියුණුවට පත් කෝටිපති ව්‍යාපාරිකයෝද සිටිති. එමෙන්ම රාජ්‍ය තාන්ත්‍රික උසස් නිල තල දරන්නන් සහ දේශපාලක ක්ෂේත්‍රයේ ප්‍රබල මැති ඇමැතිකම් දරන්නන්ද සිටිනු දකින්නට ලැබේ.

එහෙත් ඉතිහාසයේ සිට මුඛ පරම්පරාවල පැවත එන සහ ගතානුගතිකව පැවත එන මනෝ සංචතනික සංකල්ප කරන කොට ගෙන කාලසර්ප යෝගය පිළිබඳ නානා විධ චිත්‍ර මානව සිත් සතන් තුළ ගැබ්ගෙන ඇත. ඒ තුළින් අන්ධානුකරන ත්‍රාස හා බියජනක සංකල්පයන් ඇති වී තිබෙන බැව් පැහැදිලිය.

ඔබටත් පංච මහා පුරුෂ යෝග හිමියෙක්ද?

පංච මහා පුරුෂ යෝග යනු කුජ,බුධ,ගුරු,ශුක්‍ර හා ශනි ග්‍රහයන් උච්ච හෝ ස්වක්‍ෂෙත්‍ර බලයෙන් යුතුව කේන්ද්‍රස්ථානයක(1,4,7,10 ස්ථානවල) පිහිටීමෙන් උදාවන මෙම මහා පුරුෂ යෝග පහ පිළිවෙලින් රුචක,භද්‍ර,හංස(ගුරු හංස),මාලවී හා ශශ නම්වේ.

පංච මහා පුරුෂ යෝග, සුබ ග්‍රහයෝග අතර මුල්තැන ගනී. කුජ, බුධ, ගුරු, ශුක්‍ර හා ශනි (බුධ, ගුරු, ශුක්‍ර ග්‍රහයන් වන අතර කුජ ශනි අසුබ ග්‍රහයන්සේ සැලැකේ. අසුබ ග්‍රහයන්ගෙන්ද සුබ යෝග සෑදේ.) ග්‍රහයන් පස්දෙනා මූලික කරගෙන පංච මහා පුරුෂ යෝග සෑදේ. පුරුෂ යෝග යැයි සඳහන් වුවද ඒවා වාසනාවන්ත කාන්තා කේන්දරවලද දැකිය හැකිය. පංච මහා පුරුෂ යෝග, ඒවා පිහිටන ආකාරය, ඒවායින් ලැබෙන ප්‍රතිඵල ආදිය පහත දැක්වෙයි. මා දන්නා තරමින් මෙම යෝග හතරක්ම ඇතිව මේ දක්වා ජන්ම ලාභය (උපත) ලබා ඇත්තේ බුදුන් වහන්සේ පමණි. ඔබටද මෙයින් එකක් හෝ පිහිටා ඇද්දැයි ඔබගේ කේන්දරයෙන් බලාගන්න.
පංච මහා පුරුෂ යෝග

1. රුචක යෝගය.
2. භද්‍රා යෝගය.
3. ගුරු හංස යෝගය.
4. මාලවී යෝගය.
5. සස යෝගය.

1. රුචක යෝගය
මෙය රුචක යෝගය යනුවෙන්ද හැඳින්වෙයි. මෙම යෝගය කුජ හෙවත් අඟහරු ජන්ම කේන්දරයේ එක, හතර, හත, දහය (1, 4, 7, 10) යන කේන්ද්‍රස්ථානයක උච්චව හෝ ස්වක්ෂේත්‍රව සිටීමෙන් යෙදෙයි.

2. භද්‍රා යෝගය
මෙම යෝගය බුධ ග්‍රහයා ජන්ම කේන්දරයේ එක, හතර, හත, දහය (1, 4, 7, 10) යන කේන්ද්‍රස්ථානයක උච්චව හෝ ස්වක්ෂේත්‍රව සිටීමෙන් යෙදෙයි.

3. ගුරු හංස යෝගය
මෙය "හංස යෝගය" යනුවෙන්ද හැඳින්වෙයි. මෙම යෝගය ගුරු හෙවත් බ්‍රහස්පති ග්‍රහයා ජන්ම කේන්දරයේ එක, හතර, හත, දහය (1, 4, 7, 10) යන කේන්ද්‍රස්ථානයක උච්චව හෝ ස්වක්ෂේත්‍රව සිටීමෙන් යෙදෙයි.

4. මාලවී යෝගය
මෙය "මාලව්‍ය යෝගය" යනුවෙන්ද හැඳින්වෙයි. මෙම යෝගය ශුක්‍ර හෙවත් සිකුරු, ජන්ම කේන්දරයේ එක, හතර, හත, දහය (1, 4, 7, 10) යන කේන්ද්‍රස්ථානයක උච්චව හෝ ස්වක්ෂේත්‍රව සිටීමෙන් යෙදෙයි.

5. සස යෝගය
මෙය "සස යෝගය" යනුවෙන් හැඳින්වෙයි. මෙම යෝගය ශනි හෙවත් සෙනසුරු, ජන්ම කේන්දරයේ එක, හතර, හත, දහය (1, 4, 7, 10) යන කේන්ද්‍රස්ථානයක උච්චව හෝ ස්වක්ෂේත්‍රව සිටීමෙන් යෙදෙයි.

මෙම ග්‍රහ යෝග හා සම්බන්ධ ග්‍රහයන් පාප ග්‍රහයන්ගෙන් පීඩා නොවී සුබ ග්‍රහයන්ගේ දෘෂ්ටි ලබා සිටීම වඩාත් පලදායක වන අතර අදාළ (යෝගයට) ග්‍රහයා ස්ව‍ෙක්‍ෂත්‍රව සිටිනවාට වඩා උච්චව සිටීමෙන් මහඟු සුබපල ගෙන දෙයි. ඊට අමතරව යෝගයට මූලික වන ග්‍රහයා තම ජන්ම ලග්නයට යෝග කාරකයා වීම, ගත කරන මහා දශාව හා අතුරු දශාව සුබ වීම ආදී කරුණුද මෙයට බලපායි.

ඔබගේ විවාහය ප්‍රමාද වෙන්නේ ඇයි?

 

තම විවාහය ප්‍රමාද වීම පිළිබඳ බොහෝ දෙනකු ජ්‍යොතිෂවේදීන්ගෙන් විමසන බව පෙනෙන්නට තිබේ. එයට හේතුව තම විවාහය ප්‍රමාද වන්නේ ඒ වනවිට තමාට බලපා ඇති ග්‍රහයන් නිසා යැයි ඔවුන් සලකන බැවිනි. එම අදහසේ යම් සත්‍යතාවයක් ඇත.

ජන්ම කේන්ද්‍රයේ විවාහ කාරක සිකුරු ග්‍රහයා මෙන්ම එහි හත්වැන්නේ ග්‍රහයන් පිහිටා ඇති අන්දම පිළිබඳව ද අවධානය යොමු කළ යුතුවෙයි. අශුභ ග්‍රහයකුගේ නැකතට පිහිටි සෙනසුරු ග්‍රහයා සත්වැන්නේ තැන්පත් වී සිටීම පළමු ආදර සබඳතාව හෝ පළමු විවාහය කඩාකප්පල් වීමට හේතු වෙනවා ඇත.

කෙනකුගේ ලග්න කේන්ද්‍රයේ හත අධිපතියාගේ දසා කාලය මෙන්ම නවාංශක කේන්ද්‍රයේ සිකුරු සිටි නවාංශකය අධිපති ග්‍රහයාගේ දසා කාලය ගැන ද මෙහිදී සලකා බැලීම වැදගත් වේ.

නවාංශක සටහනේ දැක්වෙන 55 වැනි අධිපති ග්‍රහයා රාශි කේන්ද්‍රයේ පාප ග්‍රහයන්ට මැදි වී පිහිටීම විවාහයට දින නියම කරගෙන සිටිය ද කුමන හෝ හේතුවක් ඉදිරිපත් වී එය සිදුවීම පවා කරන බව කිව යුතුය. ග්‍රහ ගෝචරය අනුව පහත දැක්වෙන අවස්ථාවලදී ඔබගේ විවාහය පමා විය හැකි බව කිව යුතුය. එයට විවිධ හේතු ඉදිරිපත් වනු ඇති අතර එම තත්ත්වය වෙනස්වීමට ද හැකියාව ඇත.

1. සිකුරු දශාව ලබා සිටිය ද සෙනසුරැ හෝ රාහු ග්‍රහයන් කේන්ද්‍රයේ සත්වැන්න හරහා ගමන් කරන අවස්ථාව

2. දසා අධිපති ග්‍රහයා 6, 8, 12 වැනි දුෂ්ට රාශියක ගමන් කිරීම

3. ජන්ම ලග්න හෝ චන්ද්‍ර අෂ්ටම ආදී ඒරාශ්ටක පවතින කාලය තුළදී

4. සත්වැන්න හරහා සෙනසුරැ, කේතු ආදී පාපී ග්‍රහයකු ගමන් කිරීම

5. 22 වැනි දෙකර්නාධිපති ග්‍රහයා හෝ අටවැන්නාධිපති ග්‍රහයාගේ දසා කාලය

ඉහත කී සෑම අවස්ථාවකදීම විවාහය පවා වෙනවා ඇත. එසේ වුවද ලග්නයට සුබ ඵල දෙන ග්‍රහයකුගේ බලපෑම නිසා විවාහය සිදුවුවද කෙටි කාලයකින්ම බලවත් ගැටලු ඇති වී විවාහය කඩාකප්පල් වීම සිදුවෙයි. එසේම කුජ ශනි ආදී පාප ග්‍රහයකු විවාහකාරක සිකුරු ග්‍රහයාට යෝග වීම හෝ දෘෂ්ටියකින් සම්බන්ධ වීම නිසා ද විවාහ ජීවිතය බිඳවැටී දෙන්නා දෙපොලට යාම සිදුවිය හැකිය. රාහු ග්‍රහයාගේ බලපෑම නිසාද ගෘහ ජීවිතය අවුල් වී විවාහය දෙදරා යාම සිදුවනවා ඇත. බලවත් සිකුරු දසාව පවතින විට හත්වැන්නේ කුජ ගෝචරයට පත්වුවහොත් විවාහ අතරමගදී කඩාකප්පල් වීම සිදු වේ.

හිතේ කරදර අඩුකරගන්න

ඔබ ඉන්නෙ හිතේ කරදරෙන්ද?
කවද්ද මේ කරදර ඉවරවෙන්නෙ?
මේවගෙන් මිදෙන්න මොකද කරන්නෙ?
මේ වගේ ප්‍රස්න වලට උත්තර හොයාගන්න ඔබටත් දැන් පුලුවන්.
ඔබගේ හදහනත් අපගේ ඔන්ලයින් සේවාව හරහා බලාගන්න.

අපව අමතන්න 0778329919

ජීවිතයට බාධාකරන බධක ග්‍රහයෝ

 

කරන කියන හැමදේකටම මොකක්හරි අවුලක්ද?

ජීවිතයට බාධාකරන බධක ග්‍රහයෝ

බාධක ග්‍රහයා කියන්නේ ජන්ම පත්‍රය අනුව කෙනෙකුගේ ජීවිතයේ එදිනෙදා කටයුතු සඳහා බාධා, කරදර, මෙන්ම අපල ගෙනදෙන ග්‍රහයා ලෙස තමයි ජ්‍යොතිෂයේදී හඳුන්වා දී තිබෙන්නේ.

එම ග්‍රහයාගේ බලපෑම මත කෙනකුට වා, පිත්, සෙම් ආදී දොස් නරක් වී රෝගාබාධ ඇතිවිය හැකිය. හදිසි අනතුරු හා මරණයට පත්කිරීම හැකි අවස්ථා උද‌ාවිය හැකි නිසා ඒ ගැන පරීක්ෂාකාරීව සිටීම වැදගත්ය.

ඒ අනුව අදාල බාධක ග්‍රහයන් මෙසේය

1. චර රාශි වූ මේෂ, කටක, තුලා. මකර ලග්නවල බාධක ස්ථානය 11 වැන්නය
2. තිර රාශි වූ වෘෂභ, සිංහ, වෘශ්චික, කුම්භ ලග්නවලට 9 වැන්න
3. උභය රාශිවූ මිථුන, කන්‍යා, ධනු, මීන, ලග්නවලට 7 වැන්න බාධක ස්ථානය වේ.

ලග්නයට අනුව බාධක ග්‍රහයන් මෙසේය

මේෂ හා වෘෂභ යන ලග්න 2 කට ශනි හෙවත් සෙනසුරු ග්‍රහයා බාධක ග්‍රහයා වෙනවා.

මිථුන හා කන්‍යා යන ලග්න 2කට ගුරු හෙවත් බ්‍රහස්පති ග්‍රහයා බාධක ග්‍රහයාය.

සිංහ හා මකර යන ලග්න රාශි 2කට කුජ හෙවත් අඟහරු ග්‍රහයාද

ධනු හා මීන යන ලග්න රාශි 2කට බුධ ග්‍රහයා බාධක ග්‍රහයා ද වෙනවා.

කටක ලග්නයට සිකුරු ග්‍රහයාත්

තුලා ලග්නයට රවි ග්‍රහයාත්

වෘශ්චික ලග්නයට චන්ද්‍රයා හෙවත් සඳුත්

කුම්භ ලග්නයට ශූක්‍ර හෙවත් සිකුරු ග්‍රහයාත්, බාධක ග්‍රහයන් වෙනවා.

එම ග්‍රහයන්ගේ මහ දශා කාලය හෝ අතුරු දශා කාලය තුළ අපල තත්ත්වයන් මෙන්ම බාධා හා විවිධ කාර්යයන්ගේ ප්‍රමාදයන් ඇති විය හැකියි. එසේම ආසන්නව ම ගෙවනු ලබන විදශා කාලය තුළ ද ක්‍රියාත්මක වෙනවා.

ශනි මංගල දෝෂයට බියවන්න එපා

මොකක්ද මේ ශනි මංගල යෝගය 

 

අපි පොරොන්දම් බලලා විවාහය කළත් එය සාර්ථක නොවූ බව පවසන අය දැක ඇත්තෙමු. එයට හේතුව පොරොන්දම් පරීක්‍ෂාවේ දී ග්‍රහ ගැළපීමට සැලකිල්ලක්‌ නොදැක්‌වීම බව මගේ අදහසයි.
ග්‍රහ ගැළපීමේ දී විශේෂයෙන් දෙදෙනාගේ කේන්ද්‍රවල ශනි මංගල යෝගය පිහිටා තිබේද යන්නද සලකා බැලිය යුතුය.

ශනි මංගල යෝගය යනු කේන්ද්‍රයේ කොතැනක හෝ ශනි හෙවත් සෙනසුරු ග්‍රහයාත් කුජ හෙවත් අඟහරු ග්‍රහයාත් සංයෝගව සිටීම හෝ සප්තමව සිටීම ශනි මංගල යෝගය නම් වේ. මෙම පිහිටීම විවාහ අපේක්‍ෂක දෙදෙනාගෙන් එක්‌ අයකුගේ කේන්ද්‍රයේ පිහිටා ඇත්නම් එය විවාහයට අසුබ පිහිටීමකි. දෘෂ්ටියකින් සම්බන්ධ වීමත් ශනි මංගල යෝගයට අයත් වේ.

ශනි මංගල යෝගයේ සැබෑ තේරුම ශනි යනු කිලිටුවූ ඉරුණාවූ ඇඳුමක්‌ ඇති අපිරිසිදු අන්දමට ජීවත්වන විවාහය අගය නොකරන ග්‍රහයෙකි. කුජ යනු ප්‍රියමනාප පිරිසිදු විවාහය අගය කරන ග්‍රහයෙකි. මෙම දෙදෙනා විරුද්ධ අදහස්‌ ඇති ග්‍රහයන් දෙදෙනෙකි. මෙසේ විරුද්ධ අදහස්‌, විරුද්ධ ගතිගුණ ඇති දෙදෙනකු එකතුව අසාර්ථක වේ. යහපත් නොවේ.

විවාහයේ දී තදින්ම බලපාන ග්‍රහයා වනුයේ කුජ හෙවත් අඟහරුය. විවාහය ඉක්‌මන් කිරීමේ ප්‍රමාද කිරීමේ, විවාහය අසාර්ථක කිරීමේ, වෙන් කිරීමේ, ප්‍රමුඛයා වන්නේ කුජය. එම නිසා කුජ හෙවත් අඟහරුට මංගල කියාද භාවිත කරයි.

එක්‌ කේන්ද්‍රයක ශනි මංගල යෝගය පිහිටා ඇත්නම් අනෙක්‌ කේන්ද්‍රයේ එම යෝගය භංග වීමට අවශ්‍ය ග්‍රහ පිහිටීම් නොතිබුණොත් රජ පවුලක වුවත් එම විවාහය අසාර්ථක වීමට බොහෝසේ ඉඩ ඇත. පවුල් අවුල්, අසමගිකම්, හැරයැම, නීතියේ පිහිට පැතීම, වැන්දඹු වීම, දික්‌කසාද වීම ඇතිවන බව පෙනී යයි.

මෙම අසුබ ඵල ගෙන දෙන ශනි මංගල යෝගය භංග වන ක්‍රම කීපයක්‌ම ජ්‍යෙතිෂයේ දැක්‌වේ. එක්‌ කේන්ද්‍රයක කුජ ශනි යෝගව තිබේද? සප්තමව තිබේද? එසේ නැත්නම් දෘෂ්ටියට ළංව තිබේද? එම දොෂ භංග වීමට පහත සඳහන් පිහිටීම තිබිය යුතුමය.

1. අනෙක්‌ කේන්ද්‍රයේ කුජ ශනි යෝගව කේන්ද්‍රයේ කොතනක හෝ පිහිටා ඇත්නම් දෝෂ භංග වේ.

2. අනෙක්‌ කේන්ද්‍රයේ කුජ ශනි දෙදෙනා ග්‍රහ දෘෂ්ටියකින් සම්බන්ධ වී ඇත්නම් දෝෂ භංග වේ.

3. අනෙක්‌ කේන්ද්‍රයේ කුජ සිටි තැනින් 4 වැන්නේ 7 වැන්නේ හෝ 8 වැන්නේ සෙනසුරු සිටීමෙන් මෙම දෝෂ භංගවේ.

ස්‌ත්‍රී පුරුෂ කේන්ද්‍ර දෙකේ ග්‍රහ ගැළපීම් පරීක්‍ෂා කර බැලීමේදී ඉහත සඳහන් පරිදි ග්‍රහ පිහිටීම් ඇත්නම් ශනි මංගල යෝගය භංගවේ.

එහෙත් 02, 03, 06, 9, 10 සහ 11 යන ස්‌ථානවල ශනි මංගල යෝගය අසුබ ඵල ගෙනදීමෙන් ඇති නොවන බව සමහර පොත්වල දැක්‌වේ.

මේ අනුව පොරොන්දම් පරීක්‍ෂාවේ දී මෙම දෝෂ ගැන විශේෂ අවධානය යොමු කිරීම අත්‍යවශ්‍ය බව පෙන්වා දෙනු කැමැත්තෙමි.

මොනවද මේ පරිවර්තන යෝග කියන්නෙ?

ග්‍රහයන් දෙදෙනෙකු ඔවුනොවුන් අධිපතිකම් දරන රාශි හුවමාරු කර ගනිමින් පිහිටීම පරිවර්තන යෝගවේ.

ග්‍රහයන් දෙදෙනෙකු ස්වකීය අධිපති කම් දරන රාශීන් හුවමාරු කරගෙන සිටීම වටහා ගැනීම අසීරු නැත.

උදාහරණයක් ලෙස යම් අයකුගේ ජන්ම කේන්ද්‍රයේ බ්‍රහස්පති ග්‍රහයා තුලා හෝ වෘෂභ රාශි දෙකෙන් එකකත් සිකුරු ග්‍රහයා ධනු හෝ මීන රාශි දෙකෙන් එක් රාශියකත් පිහිටන විට බ්‍රහස්පති හා සිකුරු ග්‍රහයන් පරිවර්තනය වී ඇතැයි කියයි.මෙහිදී අදාළ පරිවර්තන යෝගය හැදින්වීමට ග්‍රහයන්ගේ නම් වලට වඩා භාවිතා කෙරෙන්නේ අදාළ ස්ථානය සම්බන්ධ නාමයන්ය.(ලග්නාධිපති,දෙවැන්නාධිපති,තුන්වැන්නාධිපති ආදී ලෙස)

කේන්ද්‍රයේ ස්ථාන දොලහ අතර දෙක බැගින් සංකරණයන් සැලකූ විට යෝග 66කි.මෙම පරිවර්තන යෝග 66 ද සුභ,මධ්‍යම හා අසුභ විපාකයන් සලකන ආකාරයට ප්‍රධාන කොටස් තුනකට බෙදේ.

1) මහා පරිවර්තන යෝග

2) මධ්‍යම පරිවර්තන යෝග

3) දෛන්‍ය යෝග

1) මහා පරිවර්තන යෝග

කේන්ද්‍රයේ ලග්නය,දෙක,හතර,පහ,හත,නවය,දහය එකොලහ යන සුභ ස්ථානවලට අධිපති ග්‍රහ යුගලයන් අතරේ සිදුවන හුවමාරුවෙන් ඇති වන මෙම පරිවර්තන යෝග සුභ ඵල උදාකරයි.රාජ යෝග හා සමාන ප්‍රතිඵල උදා කරන බවට සදහන්ය.ඉහත දැක්වූ සුභ ස්ථාන 8 යුහල වශයෙන් සංකරණ සැලකූ විට ගණනින් 28කි

මෙම මහා පරිවර්තන යෝග අතරින්

* ලග්නාධිපති හා 11 අධිපති අතරත් 2 අධිපති හා 11 අධිපති අතරත් ඇතිවන පරිවර්තන යෝග ප්‍රබල ධන යෝගයන්ය.

* 4 හා 11 අධිපතින් අතර පරිවර්තනය යාන,වාහන,ගේ දොර ඉඩ කඩම්, පොලොවෙන් වස්තු ලැබීමට සුභ යෝගයකි.

* 9 හා 10 අධිපති පරිවර්තන යෝගය ධර්මකර්මාධිපති යෝගයකි.වෘෂහ ලග්න හිමියාගේ 9,10 ස්ථාන අධිපති සෙනසුරු නිසා එම ලග්නයට පමනක් ශනි 9 හෝ 10 සිටින විට ධර්මකර්මාධිපති යෝගය යෙදේ.

* 10 හා 11 අධිපති අතර පරිවර්තන යෝගය වෘත්තීය බලය උසස් පදවි තානාන්තර ආදිය ඇති කරන යෝගයකි.

2) මධ්‍යම පරිවර්තන යෝග

තුන්වැන්න හෙවත් වික්‍රමස්ථානය අධිපති ග්‍රහයා 1,2,4,5,7,9,10,11 යන භාවාධිපතියන් අතර පරිවර්තනයෙන් ඇතිවන පරිවර්තන යෝග 8ක් මධ්‍යම පරිවර්තන යෝග ලෙස හැදින්වේ.සුභ අසුභ ඵල මිශ්‍රව උදා කරන බැවින් මධ්‍යම පරිවර්තන යෝග ලෙස හැදින්වේ.

3) දෛන්‍ය යෝග

පරිවර්තන යෝග 66න් මහා පරිවර්තන යොග 28ත් මධ්‍යම පරිවර්තන යෝග 8ත් හැරුනු විට ඉතිරි පරිවර්තන යෝග 30 දෛන්‍ය යෝග වලට අයත්වේ.මෙම පරිවර්තන යෝගවල අසුභ ඵල වැඩි බව සදහන්වේ.